Psalms 147
1Dumisani uJehova. Kuhle kangakanani ukuhlabela indumiso kuNkulunkulu wethu, kumnandi njalo kufanele ukumbonga! 2UJehova uyalakha iJerusalema; aqoqe labo abahlakazekileyo baka-Israyeli. 3Uyabathoba abadabukileyo enhliziyweni abophe amanxeba abo. 4Umisile ubunengi bezinkanyezi aziqambe leyo laleyo ngamabizo. 5Mkhulu uJehova wethu, njalo makhulu amandla akhe; ukuzwisisa kwakhe kakulamkhawulo. 6UJehova uyabasekela abathobekileyo kodwa abaphosele phansi ababi. 7Hlabelani kuJehova ngokubonga; litshaye amachacho kuNkulunkulu wethu. 8Uyembesa umkhathi ngamayezi; awuphe umhlaba izulu njalo akhulise utshani ezintabeni. 9Unika izinkomo utshani awaphe lamatshiyane amawabayi nxa esekhala. 10Ukuthokoza kwakhe kakukho emandleni ebhiza, loba injabulo yakhe ekuqineni kwemilenze yomuntu; 11UJehova uthokoza ngalabo abamesabayo, ababeka ithemba labo ethandweni lwakhe olungaphuthiyo. 12Umbabaze uJehova, O Jerusalema; dumisa uNkulunkulu wakho, O Ziyoni, 13ngokuba uyaqinisa imigoqo yamasango akho abusise abantu bakho ngaphakathi kwakho. 14Wenza ukuthula emikhawulweni yelizwe lakho. Njalo ukusuthisa ngamabele amahle kakhulu. 15Uthumela umlayo wakhe emhlabeni; ilizwi lakhe ligijima masinyane. 16Wendlala ungqoqwane njengoboya bezimvu ahaze iliqhwa njengomlotha. 17Uphosela phansi isiqhotho sakhe njengamatshe. Ngubani ongamelana lomfutho wakhe olomqando na? 18Uthumela ilizwi lakhe konke kuncibilike; aphephethise umoya wakhe amanzi ageleze. 19Ulivezile ilizwi lakhe kuJakhobe, imithetho yakhe lezahlulelo ku-Israyeli. 20Lokhu kazange akwenzele esinye isizwe; kaziyazi imithetho yakhe. Dumisani uJehova.
Copyright information for
NdeIBE